​ក្រុម​ម្ចាស់​ជើងឯក​ទ្វីបអឺរ៉ុប Barcelona នឹង​ចាប់ផ្តើម​ការលេង​ដោយ​គ្មាន​វត្តមាន​របស់​ខ្សែប្រយុទ្ធ Lionel Messi នៅពេលដែល​ក្រុម Bayer Leverkusen ធ្វើដំណើរ​ទៅកាន់​កីឡដ្ឋាន Camp Nou នា​រាត្រី​នេះ ដោយ​សង្ឃឹមថា អាច​ដណ្តើមយក​ប្រៀប​ចំពោះ​ការ​អវត្តមាន​របស់​ខ្សែប្រយុទ្ធ​អន្តរជាតិ អា​ហ្ស​ង់​ទីន​រូបនេះ​។ Messi បាន​រងរបួស​ជង្គង់​ឆ្វេង ខណៈដែល​ក្រុម Barcelona បាន​ផ្តួល​ក្រុម Las Palmas ក្នុង​លទ្ធផល ២-១ កាលពី​ចុង​សប្តាហ៍​មុន​។​

​ខ្សែប្រយុទ្ធ Luis Suarez បាន​បង្កើត​ភាព​អស្ចារ្យ​ក្រោយពី​ការ​អវត្តមាន​របស់ Messi ជាមួយនឹង​ការ​ស៊ុត​បាល់​បញ្ចូល​ទី​២​គ្រាប់​ដើម្បី​ជួយ​ឲ្យ​ក្រុម​មាន មូលដ្ឋាន​នៅ Catalonia មួយ​នេះ​វិល​ទៅកាន់​ផ្លូវ​នៃ​ជ័យជម្នះ​វិញ ក្រោយពី​បាន​រង​បរាជ័យ ៤-១ ក្រោម​ស្នាដៃ​ក្រុម Celta Vigo ក្នុងការ​ប្រកួត​មុននេះ​របស់​ពួកគេ​។

Barcelona នឹង​ត្រូវដាក់​ក្តីសង្ឃឹម​ជាច្រើន​ទៅលើ Suarez និង Neymar ក្នុង​រយៈពេល​ប៉ុន្មាន​សប្តាហ៍​ខាងមុខនេះ ខណៈដែល​ក្រុម Barcelona នឹងត្រូវ​ធ្វើការ​ប្រកួត​រហូតដល់​ទៅ​៨​លើក​ដោយ​គ្មាន Messi​។ ខ្សែបម្រើ Sergio Busquets បាន​ឲ្យ​ដឹងថា​៖ «​រូបគេ​ជា​កីឡាករ​ដ៏​ឆ្នើម​បំផុត​ក្នុង​ពិភពលោក ហើយ​យើង​នឹង​នឹក​រូបគេ​យ៉ាងខ្លាំង​»​។

​ខណៈដែល Claudio Bravo, Thomas Vermaelen និង Rafinha ក៏ត្រូវ​អវត្តមាន​ដោយសារតែ​របួស លោកគ្រូ​បង្វឹក Luis Enrique មាន​សមាជិក​ក្រុម​ឈុត​ធំ​ត្រឹមតែ​១៥​នាក់​គត់​ដើម្បី​ជ្រើសរើស សម្រាប់​ការប្រកួត​ប៉ុន្មាន​សប្តាហ៍​ខាងមុខនេះ​។

​គ្រូបង្វឹក​រូបនេះ​បាន​ឲ្យ​ដឹងថា​៖ «​យើង​មានសំណាង​អាក្រក់​ជាច្រើន​ដោយសារតែ​បញ្ហា​របួស លើសពីនេះទៅទៀត​យើង​មិនអាច​ទិញ​ចូល​កីឡាករ​បន្ថែមទៀត​បាន​ឡើយ​»​។ ការប្រកួត​នៅ​រាត្រី​នេះ នឹង​ចាប់ផ្តើម​នៅ​ម៉ោង​១:៤៥​ទៀបភ្លឺ​៕

​ជំនួប​ពីរលើក​ចុងក្រោយ​រវាង​ក្រុម​ទាំងពីរ​
08.03.12          Barcelona 7-1 Bayer Leverkusen
15.02.12          Bayer Leverkusen 1-3 Barcelona

​ប្រភព​៖ cambosport